Butattah Adok atau Pepaccur

pict by: bajutradisionals.com

Contoh pepaccur/ paradinei/ butattah (Belalau) lengkap

dengan dialek: A

BUTATTAH  ADOK

·            Ana de Pun kham khuppok pakhda nengis, 

          Jak jaoh jak pasukni jak lapang bidang khuwang suku unggal pekhassi, 

          sengabah sanga pekon jak sungai batang akhi.

·         Bucanang haccak tanno kittu bang lain canang

          mak canang haccak munih sudi sai kekhamikan, 

          canang sai pungguk khayu ngelibokh di dunia 

          sapa nengis ya khindu sapa ngaliak hila.

·         Indani tebih tanoh di pusokh ni lautan 

          sapa nengis ya iwoh pedom di pudanginan.

·       Sikindua jo kindo nikain tian khuppok sai tuha, 

        khik sai batin, sai batin di lamban jo, haga ngucakko cawa 

        sai hattak ni sai kingok sai hanggan ni mak lupa 

        di punyawa kemanno.

·        Maskitang batang sepuh ni tinding balang bisa 

         makubukh mati nangguh maktambak mati wakhca

         mulani nangguh munih di kham khuppok sai dija.

·        Di gedung puncak inti pusiban di pinggikh wai 

         najin tattu di mati haga titutukkon kainni tian khuppok 

         suku dalih pekhassi sai batin dalih penggawa, 

         mekhanai dalih mulli kham khuppok sai wat dija.

·        Sanak ngaji sabbihis gatti ni alif bata 

         kham khupok pakhda nengis sanak mulang nyekhita.

·        Ngedekop ngeduakh-duakh geliti ni haga labung 

         lainki basi bacakh kuk pandai nyak jo makkung.

·        Ngedekhom sukhak khamik sanak luakh sekula, 

         nabik Pun nabik tabik di batin tuha dija.

·        Indani putti jelai ti tanom di hakhis bimbin 

         sekindua mak pandai kidang jo kena kain.

·        Nyabung manuk penjukhit bukuis sanding nakkis 

         ngilak sambil nyalahan butulak 

         busasangga haga ngilak pekhittah 

         kidang mak kebinduhan mulana sekindua.

·        Sekindua jo kindo sanak huma 

          tiulangkon di nenggakha 

          hukum malim pukha sekindua mak pandai.

 

·       Hamma mak ngeba ngeba kupukh hatang ngeba mak mingokh

         sudipun ki di sai patut, 

         nyikhindua di benokh kidang sikindua mak munih ki khayya. 

·         Mubalak di tanoh Bugis mak pandai tikkah bakhis, 

         mubalak di tanoh Padang mak pandai tatah undang, 

         mubalak di tanoh Jawa mak pandai tikkah basa, 

         mubalak di tanoh Lappung mak pandai adat Lappung.

·        Nyom sinyom lalang sinyom ipon tandok suasa 

         lamon hulun menalom mawat ki sekindua.

·        Nyom sinyom lalang sinyom ipon tandok di kawak 

         lamon hulun munalom kidang mawat pecawa.

·        Nyom sinyom lalang sinyom ipon emas ni mulli 

         lamon hulun menalom kidang mawat ki dikhi.

·        Jung lunik nyindik sindik jukung  nengah humakha 

         nabik Pun nabik tabik, wat haga tibincakha. 

         Tekh hadap di sai khamik kham khuppok sai wat dija 

         guai sai paling betik adat kham di dunia.

·        Betikni sabah bedok khedik jak Sukadana 

         kham khuppok nattah kon adok, jejama pai nengis ya.

·        Nun sekin butanwin - sanak mulai ngebaca - 

          ayukna lagi batin - tanno ngakkat mit khaja.

·        Khittok munih metuttok mekhanai dalih mulli 

          kinjuk letak ni adok jo haga ti walakhi.

·       MULAI PENYEBARAN ADOK ( pemberian gelar)

·        Betikni Umbul lioh atakhan suka damai 

         lain ki kanah jimmoh adok haga tipakai.

·        Mati khebuni jambu kidang makung metuha 

         tehadap jama maju wat lehot ni hulun tuha.

·       Dang maksa guai juga tah jadi kepayahan 

         ti uyunko adab basa kekhiloh dilom lamban.

·       Nyapu sapu di khesi, bitah selak diliang 

         betik-betik do hati ngandan kon lah khih uyang.

·       Muhandak mualinak kumbang hada ni cabi

         ti uyunko ina bapak dalih minak muakhi.

·       Mati geluk ngembaca sanak ngaji di lamban 

         sai khamik nulung du’a ngekalau geluk mekhawan.

·       Indani gayau sukau di kudanni kakhiya

        butattah kidah hiau ngelepasko celaka. 

        Pun…. Kham khuppok pakhda nengis.

·       Sai debah ni nenggakhah sai dunggak ngejimponi 

        sekindua butattah  sai khamik ya nengisi

        laju di pengantin khua jong jo nekhima ya.